raam reddyಪಣಜಿ : ಹಿಂದಿಯನ್ನು ಹೊರತುಪಡಿಸಿ ಉಳಿದ ಎಲ್ಲ ಭಾರತೀಯ ಭಾಷೆಗಳ ಚಿತ್ರಗಳನ್ನು ಪ್ರಾದೇಶಿಕ ಭಾಷೆಗಳ ಚಿತ್ರಗಳೆಂದು ಕರೆಯುವುದು ಸರಿಯಲ್ಲ ಎಂದು ‘ತಿಥಿ’ ಚಿತ್ರ ನಿರ್ದೇಶಕ ರಾಮ್ ರೆಡ್ಡಿ ಅಭಿಪ್ರಾಯಪಟ್ಟಿದ್ದಾರೆ.
47 ನೇ ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ(ಇಫಿ)ದ ಸಂದರ್ಭದಲ್ಲಿ ನಡೆದ ಸಂವಾದದಲ್ಲಿ ಭಾಗವಹಿಸಿ ಅವರು ಮಾತನಾಡುತ್ತಿದ್ದರು.
‘ಹಿಂದಿಯನ್ನು ಹೊರತುಪಡಿಸಿದ ಭಾಷೆಗಳ ಚಿತ್ರಗಳನ್ನು ಏಕೆ ಪ್ರಾದೇಶಿಕ ಚಿತ್ರಗಳೆಂದು ಕರೆಯುತ್ತೀರಿ?’ ಎಂದು ವಿಷಯ ಪ್ರಸ್ತಾಪಿಸಿದ ಅವರು, ‘ಎಲ್ಲರೂ ನಮ್ಮನ್ನು ನೀವು ಪ್ರಾದೇಶಿಕ ಚಿತ್ರ ನಿರ್ದೇಶಕರೇ ಎಂದು ದ್ವಿತೀಯ ದರ್ಜೆಯ ಪ್ರಜೆಯಂತೆ ಮಾತನಾಡಿಸುತ್ತಾರೆ. ಇಫಿಯಂಥ ವೇದಿಕೆ ಅದನ್ನು ಹೋಗಲಾಡಿಸಬೇಕು’ ಎಂದು ಹೇಳಿದರು. ಸಂವಾದವನ್ನು ನಡೆಸಿಕೊಟ್ಟ ಸುಧೀರ್ ಮಿಶ್ರಾ ಇದಕ್ಕೆ ದನಿಗೂಡಿಸಿ, ಇದೊಂದು ಬಗೆಯಲ್ಲಿ ಜಾತಿ ಪದ್ಧತಿಯಂತಿದೆ ಎಂದರು.
‘ನನ್ನ ಸಿನಿಮಾ ಹಲವು ಪ್ರಶಸ್ತಿಗಳನ್ನು ಪಡೆದಿದ್ದರೂ ಕರ್ನಾಟಕದ ಮಲ್ಟಿಪ್ಲೆಕ್ಸ್ ಗಳಲ್ಲಿ ಪ್ರದರ್ಶನಕ್ಕೆ ಸೂಕ್ತ ಅವಕಾಶ ನೀಡಲಿಲ್ಲವೆಂಬುದಕ್ಕೆ ಬೇಸರವಿದೆ. ಆದರೆ, ನನ್ನ ಸಿನಿಮಾ ಕನ್ನಡ ಚಿತ್ರರಂಗದ ಗಮನ ಸೆಳೆಯುವಲ್ಲಿ ಮತ್ತು ಕೆಲವರನ್ನು ಗೊಂದಲಕ್ಕೆ ಸಿಲುಕಿಸುವಲ್ಲಿ ಯಶಸ್ವಿಯಾಗಿದೆ. ಇದು ಸಂತೋಷದ ಸಂಗತಿ. ಈಗ ಪ್ರೇಕ್ಷಕರು ಉತ್ತಮ ಕಥಾವಸ್ತು ಹೊಂದಿರುವ ಚಲನಚಿತ್ರಗಳನ್ನು ನೋಡಲು ಸಿದ್ಧರಿದ್ದಾರೆ. ಇದನ್ನು ನಾವು ಬಳಸಿಕೊಳ್ಳಬೇಕಿದೆ’ ಎಂದು ಹೇಳಿದರು.
ತಿಥಿ ಚಿತ್ರವು ಲೊಕಾರ್ನೊ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಗೋಲ್ಡನ್ ಲೆಪಾಲ್ಡ್ ಪ್ರಶಸ್ತಿ ಪಡೆದಿತ್ತು. 63 ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯಲ್ಲಿ ಅತ್ಯುತ್ತಮ ಪ್ರಾದೇಶಿಕ ಚಿತ್ರ ಪ್ರಶಸ್ತಿಯನ್ನೂ ಪಡೆದಿತ್ತು.

Advertisements